« TOTEMIC » : creacion d’una federacion e d’un portal numeric dedicats als totèms de la region Occitània / Pirenèus-Mediterranèa

Le bœuf de Mèze au CIRDOC

Aprèp l’inscripcion en 2005 del Polin de Pesenàs, un dels mai ancians animals dits «totemics» sus la tièra representativa del patrimòni cultural immaterial de l’umanitat de l’UNESCO coma part dels «Gigants e dracs processionals de Belgica e França», l’ensems dels actors e practicians que fan viure los «totems» dins los rituals festius e collectius de l’Occitània de l’ora d’ara decidiguèron de se federar tant coma lors cosins «Gigants» del Nòrd (ne saber + : https://www.federationgeants.fr).

Lo CIRDOC òbra amb las collectivitats e associacions localas dins l’encastre de sas missions d’acompanhament de projèctes estructurants per la salvagarda, la coneissença e la valorizacion del patrimòni cultural. Los elements de culturas vivas collectivas o patrimòni cultural immaterial que ne fan part, representan una part importanta que se pòt pas destacar dels autres elements de transmission culturala (documentacion, recèrca, conservacion de las òbras e objèctes supòrts d’expressions e valors culturalas).

Objècte del projècte « Totemic » :

Animaux totémiques du Languedoc

L’associacion dels Amics del Polin de Pesenàs decidiguèt de lançar lo projècte de creacion de la federacion de totems occitans e catalans de la region Occitània / Pirenèus-Mediterranèa, dita « Totemic », e que sos objectius son :

  • d’organizar los acamps mensuals del comitat de pilotatge que recampa los diferents actors e practicians regionals e nacionals del patrimòni cultural immaterial ;
  • d’animar de forums dobèrts d’escambis e transmission ;
  • de concebre un eveniment grand d’inauguracion, « la Ronda dels Totems », del 30 de junh al 2 de julhet de 2017 a Pesenàs, eveniment d’envergadura europèa que recamparà los gigants e totems de Fança, de Belgica e d’Espanha ;
  • de crear una federacion d’associacions e collectivitats concernidas qu’a per tòca una milhora cooperacion regionala entre las comunautats portairas d’un totem ;
  • la mutualizacion de mejans tecnics, financièrs e umans ;
  • una milhora visibilitat e de perspectivas novèlas al nivèl local, regional, nacional e internacional ;
  • la valorizacion del patrimòni cultural immaterial regional per l’alimentacion e la participacion a un portal numeric dedicat als totems regionals integrat als portals e basas de referéncia via lo CIRDOC e lo projècte Occitanica (www.occitanica.eu).

Contribucion del CIRDOC al projècte Totemic :

De son costat lo CIRDOC participa e sosten la creacion de la federacion Totemic per :

  • sa contribucion al dintre del comitat de pilotatge e dels forums, notadament per son expertisa e sos utisses en matèria de cooperacion e d’internacionalizacion, d’ajuda al management administratiu e financièr de projèctes culturals, de gestion, tractament e valorizacion de ressorgas documentariás, scientificas, culturalas ;
  • la creacion, l’albergament, l’administracion e l’actualizacion dels utisses tecnics de valorizacion numerica (portal numeric « Totemic » e l’interoperabilitat de sas donadas amb los portals e basas de referéncia : Occitanica, portals regionals, basas nacionalas e internacionalas) ;
  • la difusion liura e a gratis de las donadas e ressorgas coprodusidas dins l’encastre d’aqueste portal ;
  • la documentacion e l’archivatge (numeric compres) de las donadas produsidas per a federacion ;
  • la creacion d’una « Totemotèca », bibliotèca numerica de ressorgas de referéncia suls totems, integrada als portals Totemic, portal de la federacion e Occitanica, portal collectiu de la lenga e de la cultura occitanas e tanben al dintre del Repertòri del patrimòni cultural occitan e dels portals regionals de la cultura e del patrimòni ;
  • l’organizacion d’eveniments publics, dins sos locals o en defòra, susceptibles de respondre als enjòcs dels actors agropats dins la federacion e que respondon a las missions del Centre : produccion e difusion larga dels sabers actuals, coneissença e valorizacion del patrimòni cultural, transmission e apropriacion pels publics dels elements del patrimòni cultural del territòri.

+ de ressorsas :

Ne saber + sus las missions regionalas del CIRDOC en matèria de salvagarda, coneissença e transmission del patrimòni cultural immaterial (veire l’article titolat : La convencion de cooperacion entre la region Occitània / Pirenèus-Mediterranèa e lo CIRDOC per la salvagarda e la transmission dels patrimòni cultural immaterial regional.)

Descubrir los « totèms » d’Occitània e d’endacòm mai : veire totas las ressorgas disponiblas dins la Totemotèca  d’Occitanica, portal collectiu de la lenga e de la cultura occitanas

TwitterFacebookGoogle+LinkedInPinterestTumblrEmail