Memòria cantada d’Aude, un projècte menat cotria per Lo Bramàs e Lo CIRDÒC

Dins l’encastre de sa mission d’archivatge de las donadas numericas del domeni occitan, lo CIRDÒC reçaupèt, dins l’amira de lor conservacion e valorizacion, una còpia dels collectatges de la memòria cantada que Laurent Cavalié realizèt dins Aude e los territòris limitròfes per l’operacion Lo Bramàs.

Dempuèi qualques annadas, Laurent Cavalié, artista del Menerbés que mena un trabalh d’escritura de cançons e de composicion musicala que s’apièja sus la cultura e la lenga occitanas, realizèt un trabalh de collectatge. Aital, son centenats de cançons que foguèron collectadas. D’unas son completas, d’autras devon èsser reconstituidas. La Companhiá Lo Bramàs nasquèt, als costats de Laurent Cavalié, de la volontat d’un collectiu d’artistas d’enrasigar totjorn un pauc mai sa desmarcha de creacion sus las tèrras lengadocianas (Aude e Erau) que n’es eissit.

Dins un objectiu de transmission del repertòri aital reculhit, Laurent Cavalié e l’associacion Lo Bramàs recampan un collectiu de cantaires e cantairas occitanofòns e lor confian a cadun un cèrt nombre de dorsièrs d’enregistraments per tal que s’apropièsson e reinterpretèsson lo repertòri que lor es estat fisat. L’etapa seguenta serà l’enregistrament d’aqueste trabalh de transmission e de reapropriacion tant coma la realizacion de videos a l’entorn d’aqueste trabalh.

La restitucion d’aqueste projècte se farà d’una part al dintre d’un espaci numeric desvolopat pel CIRDÒC e dedicat a l’ensem del projècte (collectatges de la memòria cantada, documentacion escrita ligada a aqueles collectatges e al trabalh de recèrca de Laurent Cavalié menat en parallèl d’aquestes collectatges, trabalh d’autocollectatge de reïnterpretacion e videos sus aqueste etc.) e d’autra part per d’intervencions, formacions, accions de transmission a partir d’aqueste trabalh, dins de conservatòris per exemple.

Aital lo CIRDÒC se dona coma objectiu :

– d’assegurar l’archivatge perenne dels fichièrs remeses ;

– d’ajudar a la numerizacion dels archius papièr associats al còrpus sonòr ;

– de faire un inventari de l’ensem del fons (fins a las videos e als sons de las seradas d’autocollectatges) jos la fòrma d’una basa de donadas interrogabla en linha per tal de les rendre accessibles als publics dins l’encastre del projècte numeric Occitanica.eu.

De son costat, Lo Bramàs :

– depausèt al CIRDÒC los collectatges faits dins l’encastre de l’operacion menada per Laurent Cavalié e tanben de la documentacion amassada en parallèl ;

– recampa los artistas que participan al projècte d’autocollectatge que n’organiza las sessions d’enregistraments (datas, luòcs, material, personal etc.) ;

– restituís aqueste trabalh e de las ressorsas produsidas o mesas en linha jos la fòrma d’intervencions e d’accions de formacion e de transmission (conservatòris de Narbona, Carcassona, COMDT, etc.).

TwitterFacebookGoogle+LinkedInPinterestTumblrEmail