Lo CIRDÒC e l’Institut d’estudis catalans signan un acòrdi de cooperacion pel desvolopament dels projèctes numerics scientifics e culturals a l’entorn de l’edicion electronica de la lirica occitana medievala

L’Union academica internacionala (UAI) dirigís dempuèi 1961 lo projècte de constitucion d’un còrpus d’edicion de referéncia dels poèmas dels trobadors de l’Edat Mejana, intitolat « Còrpus dels Trobadors ». L’UAI a encargat la seccion de Filologia de l’Institut d’estudis catalans (IEC) de perseguir lo projècte d’edicion critica de l’ensemble de las òbras dels trobadors. Dedicada a l’estudi e a la difusion de las coneissenças sus la lenga e la cultura catalanas, l’IEC desvolopa dempuèi d’annadas aquel projècte ambiciós dins l’encastre del portal www.trobadors.iec.cat supòrt d’una vasta entrepresa d’edicion electronica scientifica de l’immense còrpus de las cançons e dels poèmas dels trobadors.

En octòbre de 2017, lo CIRDÒC ven partenari de l’IEC dins l’amira de contribuir als progrèsses del vast chantièr scientific e tecnic que constituís lo « Còrpus dels Trobadors », e de desvolopar los escambis de ressorsas, de donadas e de saber-far entre las doas institucions catalana e occitana.

L’objectiu de la collaboracion es la mesa en òbra d’otisses innovants pel tractament, l’estudi e la difusion dels tèxtes en occitan ancian a l’ora de las tecnologias del lengatge. Aquel objectiu se traduirà pel desvolopament de mantuna accion coma :

  • l’escambi de donadas e de ressorsas per la coneissença de las cançons e dels poèmas dels trobadors occitans ;
  • la numerizacion de la documentacion ;
  • l’edicion electronica ;
  • la creacion d’accèsses e de ressorsas complementaris entre Occitanica e le « Còrpus dels Trobadors » ;
  • la realizacion d’un diccionari open data de l’occitan ancian que permeta la reconeissença e la correccion automatica dels caractèrs dins los tèxtes ancians ;
  • l’organizacion de rencontres scientifics internacionals sul subjècte.

Lo CIRDÒC a collaborat a mantun projècte per la coneissença e la descobèrta de l’excepcional eiretatge que constituís lo còrpus de las cançons dels trobadors occitans, en particular La Tròba, jos la direccion de Gérard Zuchetto amb lo Troubadours Art Ensemble e las edicions Tròba vox. Collaboracion que se perseguís a l’ora d’ara per concebre una version numerica d’aquela antologia cantada dels trobadors.

Ligams :

Descobrir lo projècte « Còrpus dels trobadors » desvolopat e dirigit per l’IEC en partenariat amb l’Union academica internacionala e lo CIRDÒC : www.trobadors.iec.cat

Descobrir lo projècte de la colleccion « La Tròba » : http://www.art-troubadours.com/pages/PagesTrobaVoxEdition/latroba.html

Descobrir la civilizacion dels trobadors sus Occitanica, portal de la lenga e de la cultura occitanas : http://occitanica.eu/omeka/items/show/257

TwitterFacebookGoogle+LinkedInPinterestTumblrEmail